VENG FAIAH ZOTE THLANG

Get real time updates directly on you device, subscribe now.

Inrinni khan Champhaiah Faina Hapta 2021 chu ‘Faina-Kan in leh a chheh vel atangin’ tih thupui hmanga bul tan a ni a. Champhai DC Maria CT Zuali chuan Faina Hapta 2021 hi a hawng.
Khuallian Maria CT Zuali chuan hun rei tawh tak atanga fai tura hmalak a ni chunga kan ka fai tawk lo fo chu a vei hle tih sawiin, faina tluantling nei turin mitin kan thawhchhuah a ngai a ni, a ti a. Fai tih chen a in an loh thu sawiin, ram changkang zawkte elpha ve tura theihtawp chhuah a ngai a. Neitu nihna nen vantlang hmunhmate enkawl a tul a, a mawi leh fai thu-ah district mipui kutah mawhphurhna sang tak a awm tih a sawi a.
District nuam leh mawi ber, Champhai District hmun mawi leh nuam, sik leh sa nuam tak awmna chu hlutna chang hria a, a tlawhtute tan a hmuhnawm lehzual nan a paihna hmunah chauh bawlhhlawh paih thin turin mipui a chah a ni.
Faina Hapta hawnna hunah hian faina kawnga hmalakna hrang hrang leh Azadi Ka Amrit Mahotsav kaltlanga huaihawt, hnawm paih mai tur atanga thil tangkai siam chhuah ‘Waste to Art’ intihsiak lawmman chu
Khuallian hian a sem a.
Veng fai berah Zote thlan niin, faina kawnga hma la tha berah Kanan Veng thlan a ni a. Plastic hnawm hman tlem kawnga thawk tha berah Vengthlang thlan an ni bawk. Waste to Art intihsiakah Vungsannuami, Zion veng chu pakhatna niin, Lalthlamuana Ralte, Kahrawt veng chu pahnihna a ni a; Lalrawngbawli, Bethel veng chu pathumna a ni. Sanitation Worker thawk tha berah, hmeichhe lamah Laltlingliani leh mipa zingah Lalhmangaihzuala te chu thlan an ni bawk.
Faina hapta hman chhung hian Champhaiah fai endik a ni dawn a. Sawrkar Pisa leh Sikul fai endik turin MJA Champhai District; Veng fai endik turin YMA Sub-Hqrs; Restaurant, Hotel, Hospital leh Bazaar fai endik turin MHIP Sub-Hqrs. ruat an ni a. Faina thupui thlan hmanga Mass Photography Competition buatsaih a ni dawn bawk. Lawmmante hi Faina Hapta khar ni, October ni 8, 2021 khian New Champhai-ah semchhuah a ni ang.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More