Members’ Meeting Vawi-2 na tluang takin nei ta
Venglai October, 19 : Branch Executive Committee leh OB Meeting-in ruahmanna a lo siam tawh angin Ni 16.10.2008 (Ningani) zan Dar 7:00 khan Venglai Branch YMA Members’ Meeting Vawi 2-na chu Venglai Community Hall-ah tluang taka neih a ni ta. Member Sangkhat chuangah Mi 100 vel chauh kal thei.
Kum 2008 chhung atana Venglai Branch YMA Members’ Meeting Vawi 2-na, Ni 14.10.2008 (Thawhleh) zan a neih tum chu vengchhungah chhiattawk kan neih avangin Ni 16.10.2008 (Ningani) zan khan Venglai Community Hall-ah tluang taka hman liam a ni ta. Zoawi Lelte (Top 4), Nl. Lalmalsawmi, Vengsang-in member kalkhawmte min awihlim hle a, Tv. C. Lalmuansanga erawh taksa lam dam lohna avangin a rawn tel thei ta lova ni.
Members’ Meeting Vawi 2-na hi Pu F. Laltanpuia, Treasurer-in hneh takin a kaihruai a, Upa T. Lalhranga, UPC (Mz)-in hunserh a hmang bawk. He hunah hian Thupui 3 hmangin YMA member kalkhawmte infuih tharna hun hman a ni a. “Chhiatni/ Thatnia Nula leh Tlang-valte mawhphurhna” tih hmangin Pu V. Hrangzika, Br. E/M in thu tha tak tak a sawi a. “Khawtlang Inrelbawlna ” tih thupui hmangin kan Branch President, Pu Lalhlupuia’n kalkhawmte chu zirtirna a pe bawk. Tin, YMA-in Kumpuan a a neih mek “Ruihhlo Do” tih hmangin Pu C. Hrangluia, Adviser-in Ruihhlo Do a tul ziate, Ruihhlo-in kan ram a tihchhiat tawh ziate leh YMA Member te chuan kan tha thlah mai thei kan nih loh thute a sawi a, Thupui hrang hrang hmanga infuih tharna leh zirtirna ngaihthlakte chu member kalkhawmte chuan hlawkthlak an ti hle a ni. Lawmthu sawina hun Pu K. Lalsawivela, Vice- President-in a nei bawk.
Kumin hian kan Branch ah member hming ziaklut 1008 kan awm a, chung zinga mi tlawmngai 100 vel chiahin he hun hi an hmang thei a ni. Mi thahnemngai zawkte chuan hetiang zela YMA Rawng-bawlna hi kan ngai pawimawh lo a nih chuan Kum khat chhung vel chu YMA hi thiat chhin ila, a tha lawng maw tiin rilru an pu hial a ni. Engpawh nise, kan inenfiah a tulin a pawimawh hle a ni.
Boral
* Pu KVR. Hmachhuana (46) S/o. C. Zaluti, ZP Section chu Kar hmasa Inrinni tlailam khan an Sangha man haw lam, Khawivanrial-in a zuk a, ramhnuai atanga phurh haw a nih hnuin Zan Dar 1:30 velah a boral a, a ruang hi tlaivarpui a nih hnuah a tuk Pathianni khan Venglai Thlanmualah vuiliam a ni. Pu KVR. Hma-chhuana hi YMA member a nih angin lenkhawm zan tawpah member te’n ralna sum ken-khawm a ni a, Rs.750/- lai a tling thei a ni.
Naute thar
@ Pu C. Lalromawia, HH. Sec. te nupa chuan kar kalta Nilaini khan Champhai Dam-dawi In-ah fapa thar duhawm tak an nei a, naute hi dam lohna in a tlakbuak rih avangin Aizawl lamah enkawl mek a ni.
@ Pu Vanrokima, HH. Sec. te nupa pawhin kar kalta Zirtawpni khan anmahni Inah fapa duhawm tak an nei thar bawk a, naute pawh a tha e
@ Pu Lalnithanga S/o C.Lallura Keikawla Sect te nupa pawhin tunkar thawhleh ni khan a pathumna atan fanu thar duhawm tak an nei thar ve leh ta .
Naute nei tharte kan lawmpui tak zet a ni.
Pem thar
@ Pu Laltluanga te chhungkua, member 5 te chuan Vengthar Branch YMA atanga Pem Lehkha fel tak rawn thehlutin kan Vengah an rawn pemlut a, an Inluah hi kan hre mai lova, ngaihdam kan dil e.
In luah sawn
@ Pu C. Lalthawmliana te chhungkua chuan an In sak thar RCC Building (Lenrual Office chhak) chu kar hmasa lam khan an luan thar a, kan lawmpui hle a ni.
Insuan phei
@ Pu Hrangkapa, KK Sec. te chhungkua pawhin Pu C. Thawma In, Chawngduma Section ami chu an luah thar bawk. Section lamin Cencus Bu-ah ziahfel a ngai ang.
Alphabet bawm
Kan Branch Alko Signboard Alphabet (Hawrawp) chu a bawm kan neih mumal loh avangin kar kalta a Branch & Section OB Meeting chuan Alphabet bawm siam nise tiin a rel a. Pu F. Vanlaltluanga, Leader, CD Section chuan Alphabet Bawm mawi tak, a chhin nei, a pindan 6 awm chu a thlawnin min siamsak a, a chungah Branch hruaitute an lawm hle a ni.
Tling thar
@ Tunhnaia IR Police an lak tharah khan Tv. C. Lallawm-zuala S/o. C. Lalbula, HH Sec. leh Tv. R. Lalbiaktluanga S/o. R. Lalkhuma, ZP Sec. te chu an tling thar bawk a, ENTU lamin kan hriat tlai deuh avangin kan rawn tichhuak mai lova, ngaihdam kan dil rualin kan lawmpui tak zet a ni.
Damlo
@ Pu F. Zosangzuala S/o. F. Aizika, CD Section chu taksa vung leh khawsik natna avangin Aizawl lama enkawl mek a ni a, tunah chuan a ziaawm viau tawh e.
@ Tv. C. Lalmuansanga (Mess-a) S/o. Laltlanthangi, CD Sec. pawh Mitliam natna avangin anmahni chenna In lamah enkawl mek a ni a, a ziaawm viau tawh e.
Dam lote an dam leh thuai kan duhsak tak zet a ni.
E/Roll Bu min pe
@ MPC ‘S’ Block, Champhai chuan kan Branch YMA hman atan E/Roll Bu thar min pe a, kan hruaitute an lawm hle a ni.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
Sub-Hqrs YMA Committee
Ni 14.10.2008 khan Champhai Sub Hqrs YMA chuan Committee Hall a Committee an nei a chuta an thurel te chu :
Rorel 1-na: 63rd YMA General Conference kal dan tur chungchang : Committee kohna a ngenna an siam angin YMA Gen. Conference a kal tura in report Branch hrang hrang atangin report ngaih thlak a ni a, Branch thenkhat rokhawlhna avanga an la chian theih loh avangin Conference kal tur zat a la chiang thei lova, Conference kal dan tur chungchangah hetiang hian ruahmanna siam a ni.
Conference kal tur mahnia Motor keng thei turte chuan ni 17.10.2008 ral hma ngeiin Secretary Sub Hqrs YMA Champhai hnenah in report nise, hun tiam chhunga in report lote chu mahnia inngaihtuah chawp mai nise an ti a. a kalna tur Lirthei lo ngaihtuah turin OB te ruat an ni.
Rorel 2-na: MLA Election thuchah neih chungchang: Mizoram MLA Election 2008 ah hian inthlanna muanawm, felfai leh thianghlim tak kan neih theih nan thuchah neih nise tih a ni.
Sub Hqrs YMA Inthlan thuchah
1. India khua leh tui kan nihna lantir turin mitin te’n rilru thianghlim leh ngaihtuahna zalen tak chunga ram roreltu tura kan mi duh thlang (Vote) theuh turin.
2. Inthlanna neih chhungin danin a phal bak sum leh pai seng lo tur leh Campaign ruaitheh siam lo turin
3. Inthlan Campaign laiin mipui ti chiai zawng leh vangtlang tana bengchheng lutuka aurinna (Mike) hmang lo turin
4. Khawlai dung leh vangtlang hmunte ti hmelhem khawpa Party banner leh Flag te tar lo turin
5. Hel leh ralthuam hmanga in rikrapna a awm lohna turineng party mahin hetianga ngaihtheihte hmanrua a hmang lo turin
6. Ram leh khawtlang tana tha leh hmasawnna, tihhlawhtlin theih ngei turte chauh mipuia tlangzarh turin Party tin Candidate te kan ngen bawk a ni.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
Khawivanrial kawlh va la
@ Kan Branch Member mi tlawmngai 7-te chuan Pu KVR Hmachhuana (Sena) zuk hlumtu Khawivanrial chu Nilai Zan khan an va bei a, heng Khawivanrial te hi an lo kawlh hle a, kan Pasalthate pawh hi an lo seh nial nghe nghe a ni. Amaherawhchu, thian chhan thihngam,Venglai Pasaltha te hian Khawivanrial sual te hi an va hal darh ta vek a ni. Khawivanrial sual beia thihngam lu pua va thawkchhuak, mi 7 te hi kan Branch YMA chuan a chhuang hle a ni. Venglai an va timawi tehlul em !!!
Special Camping nei leh dawn
@ Kan Branch YMA, Demand Reduction, Research & Survey Group (JEHOVA SHALOM TEAM) te chuan Kar kalta khan Vengthlang North Presbyterian Kohhran nen tang tlangin SPECIAL CAMPING an buatsaih a, Camping-ah hian taksa leh thlarau nuna harsatna nei, mi 20 dawn lutin, an zinga mi 9 te chuan Piantharna an chang a. Nizan atang khan Vengthlang North Presbyterian Kohhran Followup Programme an hmang a, zanin ah pawh Followup Programme hi chhunzawm leh tur a ni ang.
Tin, Naktuk (Ni 20.10.2008) atang hian Vengthlang North Presbyterian Kohhran Biak Inah SPECIAL CAMPING hi neih leh nghal tum a ni a, Speaker atan Tv. C. Lalhmingsanga leh Pu Zodinsanga, Vengthlang te an ni ang. A lut duh te chuan Mutbu leh Buhfai Kg.6 kengin Vengthlang North Presbyterian Kohhran Biak In pan mai tur a ni ang.
&&&&&&&&&&&&&&&&&&&&&&&&&&&&&&&&&&&&&&&&&&&
Chawimawina Certificate kan hlan
Members’ Meeting vawi 2-na ni 16.10.2008 (Ningani) a kan neih tuma kan Veng chhunga Zirlai tithate leh infiamna lama State leh National level a Medal la, kan Branch YMA in chawimawina Certificate a pek te chu heng mite hi an ni.
1. David Lalkhawngaiha S/o. C.Rongheta
2. Zonunpuii D/o. Lalpiangthara
3. Ngurthansanga Sailo S/o. Lalthangvunga Sailo
4. Lalnghakmawia S/o. Rokamlova
5. Lalrinpuii d/o. R.Chalhnuna
6. VL Hmangaihtluanga S/o. J.Rosanga
7. Lalbiaksanga S/o. Lalneihthanga
8. V.Lallawmkima S/o. Lalneihthanga
9. C.Lalruathlua S/o. KV.Khuma
10. C.Vanlalduata S/o. KV.Khuma
11. K.Lalparmawii D/o. K.Lalsawivela
12. Malsawmhlua S/o. Laldenga
13. Vanlalruati D/o. Laldingliana
14. Merylene Zohmingliani D/o. R.Lalsawma
15. TC.Lalramengmawia S/o. T.Lalmuanpuia
16. Lawmsangzela S/o. Hmingthanmawia
Branch YMA Information hmanga theihtawpa In report tura in hriattir a nih laiin a bikin Zirlai titha zingah in Report lo kan tam deuh hlek tih hriat a ni a, In Report chin chauh certificate hi siam a ni a, In Report lo Zirlai thitha emaw Sport lama Medal dawng kan lo awm a nih chuan kan tih leh hun atan a In report tawh ngei turin kan in hriattir a ni e. Branch YMA chuan a tam thei ang ber Certificate hlan hi kan duhthusam a ni e.Chawimawina Certificate kan hlan zinga a hmasa 1-11 te khi Sport lama titha National leh State level a Medal rawn hawn te an ni.12-16 te khi Zirna lama mi hlawhtling kan neih te an ni. Zirna leh Sport lama hma kan sawn zel theih na turin thalai te keimahni hma zawn theuh ah tan ila tlang ang u.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
MUZUK FEI !!
(Chawngkhum Dan Tlang Huat Loh)
@ Kan thlalak released a nih zet kha chuan.. Kan sakruang kimtlang engkim lo lang e, a pawi lo.. Lalpa’n min hmangaih tho” tiin kan inhnem chawp ve leh mai a…….
… Xire-a te pafa (God Must Be Crazy)
@ Ngur lama Motor kal tur hria chuan min lo hrilh hram teh u, ALU Bag phurh phei tur ka nei tlat mai le !!!
… In thian, U Maenga
@ Electric Venga liam phei nazawng hian Chawltui an dawt kher lo, lanu leng vang pawh a ni ve tho a nia !!!
… Arnold Muantea
@ Fapa nei theuh theuh, Pa leh pa, han in hmu tlawva lutuk tur chu kan awm bikib ka hre ta lo.. Thianpa Hute-a kha lo hrilh ula, “Ani pawhin fapa a nei ta e” tiin…
… Leader, Hranghleia Section
@ “Lal Solomona iangin Ka mit it zawng ka hlah love, ka duh tak chu ka thlang nalh zel”..
…. Pamamtea
@ Ku’ Muanga te Ina ka daikal lai Video Camera hmanga thla min laksak kha chu ka damchhungin pai daih mai ka tum tawh lo, a NICE lo riau a lawm ….
…. Sente-a, CD Section
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
Veng fai ber Venglai
India Hnam Pa, Mahatma Gandhi piancham denchhen a FAINA HAPTA Champhai Town Hall-a neih zawh takah khan veng fai inelnaah Venglai pakhatna kan ni leh ta.Kum tina kan hman thin, FAINA HAPTA kharna Inkhawm, Pu C. Lalawmpuia, President, Sub- Hqrs. YMA, Champhai kaihhruai ah hian FAINA HAPTA denchhena fai inelna chi hnih (Veng fai leh Sikul fai) Result puanna leh lawmman semna neih a ni. Zaithiam lar- Mimi Lalzamliani, Alex Lalchhuankima, Henry Lalmalsawma leh Zonunmawii te’n kalkhawm mipui te chu zaiin an awi a ni.
Veng faiah I-na Venglai kan ni leh a, 2-na Kahrawt Veng, 3-na Tlangsam te an ni. Tin, Zirna In (Sikul) fai inelnaah I-na Govt. Vengthar P/S, 2-na Govt. Zote M/S, 3-na Vengsang High School te an ni. Kumin a fai inelna lawmman an siamte hi kum dang zawng aiin a tlem a, I-nain Rs.5,000/- leh Certificate, 2-nain Rs. 4,000/- leh Certificate, 3-nain Rs. 3,000/- leh Certificate an dawng a ni.
FAINA HAPTA Veng fai inelnaah Kum 2003 leh 2007 ah te I-na kan lo ni tawh a, kumin nen hian vawi 3 zet Veng fai ber kan ni ta a ni. A zawna Veng fai ber kan nih theihna tura chhungkaw tinte leh kan V/C te nena kan thawh hona tha tak te avangin kan Branch hruaitute chuan lawmawm an ti hle a, lawmthu an sawi a ni. Chutih rual chuan chhungkaw tinte’n mahni In leh a vel uluk taka enkawl chhunzawm a, FAI chhunzawm zel turin min ngen bawk a ni.
Kawng Zauh
@ Pi Biakchhungi te chhungkua, Kei-kawla Section chuan an kawt Motor kawngpui chu a ko rualrem lo te la rualin an lai zau va, a leivung hi an Motor in an paih nghal zel a, Pu Vanramsanga (En-tluang) te chuan an JCB hmangin an laih pui bawk a, an chungah khawtlang hruaitute an lawm hle a ni.
Phone Bill
@ Telephone Bill (BSNL) Landline leh Mobile Pu Sailothanga hnena pe thin ten Bill kan pek dawnin pawisa nawi neih hram hram tum theuh ila, tin, Zan lamah Phone Bill hi pek hi engemaw harsatna a thlen thin avangin tih loh hram tur a ni ang.
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&
Town Area Branch OB thukhawm
Kar kalta Inrinni khan Champhai Town Branch 8 O.B te chu chhiatni thatni a inkaihhruai dan tur leh Damdawiin a Thisen pek dan turte sawiho in an thukhawm a, hetah hian Dinthar veng chu engemaw harsatna avangin an kal thei lo a. Branch pasarih aiawh ten ro an rel ta a ni.Heta an thurel langsar deuh deuh te chu;
1. Champhai khawpui chhunga Branch 9-te chhiatni a rualkhai zawka kan kaltlan theih nan Branch OB meeting kaihhruai turin convener siam tha an ti a. October 2008 – january 2009 chhung atan convener turin Pu Lalhlupuia President venglai Branch YMA, Pu H.Vanlalthanga President Bethel Branch YMA, Pu C.Hrangmanthanga President Vengthlang Branch YMA te ruat an ni a, a khat tawkin a tul anga in hmuhkhawm thin nise an tih bakah. Leilunga chhiatna lo thleng thut a awm thulhah Sub Hqrs YMA hruaitute kut tichak turin pheikhai rual zawka ke pen chhuak tura inbuatsaih tha an ti.
2. Mithi lumen, Pathianni (Sunday) a vui ngai an awm nikhuaah kohran inkhawm tibuai lo turin chhun dar 12:00 noon ah vui thin nise.
3. Zualko intirh chungchangah kalphung neih mek chu tha an la ti tlang a, mithi chhungte chhungkhat hnaivai, mithi ina lo thleng tawh leh telephone a hriattir tawhte Zualko form ah an hming ziah lan kher ni tawh lo se an ti.Chhiat tawh nikhuah hrilh tur kan ngah lutuk hi Zualko intirh chungchangah harsatna a awm thin avangin chipui nazawng hrilh hriat vek ching lo turin Branch tinin mahni huamchhungah hmalak nise an ti a, hemi bakah hian Champhai Town huam chhungah Zualko intirh dan fel leh rang pawh ngaihtuah chhuah chhoh zel tul an ti bawk.
4. Tlaivar zan zanlaiah Thingpuisen sem leh a pawla sem chungchangah chuan Branch thuneihna ah dah nise an ti.
5. Khualkhua atanga ruang lo thleng tur, Motor hmanga kawng laka lo hmuah luai luai hi bansan thiam nise an ti a. Ruagn lo hmuak te chuan Town Area bak pel lova lo hmuah thin nise, hei hian harsatna bik avanga inhmuah tul chu huam lo se.
6. Jt YMA in Blood Donation Routine a lo siam tawh chu an thlir let a, a hnuai a mi ang hian Routine thar siam nghal a ni.
a) Oct 2008 – Electric & Vengthlang Branch
b) Nov 2008 – Kanan & Dinthar Branch
c) Dec 2008 – Bethel & Vengthar Branch
d) Jan 2009 – Kahrawt & Vengsang Branch
7. Khualkhua hmun hla zawka zan rei tawh (11:00PM – 3:00AM) a boral,
ruang rawn kal hun tur leh thlen hun tur pawh hriat mai loh, zan laia Informatrion Cenetr hmanga puan nghal mai thin hi tih tawh loh nise, zing khawvar hnuah Information Center atanga puanchhuah ni tawh zawk se.
8. Postmortem chungchang a harsatna awm thin chungchangah District magistrate leh District SP te biakrawn a,a tul anga hmala zui tura ngen nise.
9. Mithi pangpar kan inpek thinah hian a petute hming ziah lan tawh loh nise, Pangpar inpek aiah ralna sum inpe zawk turin Branch tin ten inzirtirna tam zawk pek nise an ti. Pangpar thlalakpui chungchangah Branch hrang hrang ten kalphung an lo neih mek chu tha an ti tlang bawk a ni.
&&&&&&&&&&&&&&&&&&&&&&&&&&&&&&&&&&&&&&&&&&&&&&
Census peihfel
Venglai V/C huamchhunga chhungkaw chengte inchhiarna (Population Cencus) kan neih chu a Bu-a siam turin Print fel a ni ta. Venglai V/C te leh Section tinah a Copy semchhuah a ni. Chhungkaw thenkhat chuan inchhiarna (Population Cencus) hi kan ngai pawimawh tawk lo deuh va, mahni chhungkaw dinhmunte report tura hriattirna vawi engemaw zat chhuah a nih hnu pawhin kan ngaihsak lova. Venglai Branch YMA chuan Cencus Bu-a hming awm lote chu Venglai mi leh sa dik tak angin a en thei dawn lo a ni tih kan inhriattir nawn leh e.
Citation hlan
@ Ni 8.10.2008-a Kanan Br. YMA Diamond Jubilee kharna inkhawmah khan Branch Executive Committee-in a lo rel tawh angin Branch hmingin Lawmpuina Thuziak mawi (Citation) kan hlan.
Tui hunna min pe
@ UPC Of Mizoram, Venglai Kohhran chuan kan Branch-in a tul anga kan hman atan Fridge Bottle (Tui hunna) changkang leh mawi tak 4 min pe thar a, UPC Of Mizoram, Venglai Kohhran chungah kan Branch hruaitute’n lawmthu an sawi tak a ni. Tuichangral District UPC Khawmpui Lian, kan Veng Community Hall-a neih zawh takah khan kan Branch Kumpuan Sub- Committee chuan Security hna kan thawhsak avangin Kohhran hruaitute an lawm hle a, lawmthu sawina atan Fridge Bottle te hi min pe a ni.
Motor thar
@ Pu H. Taithuama, ZP Sect. te chhungkua chuan Taxi mawi tak an la chhuak thar.
@ Pu Lalhmingliana (Mahminga), HH Sec. te chhungkua pawhin Gypsy an nei thar bawk.
@ Pu RS. Vantharnghaka (Vantea), HH Section te chhungkua pawhin Car mawi tak an nei thar bawk.
@ Pu JH. Thahleikhuaia, HH Sect. te chhungkua Car mawi tak an nei thar bawk.
@ Pu C. Bualsiama, KK Sec. te chhungkua pawhin Maruti Car an nei thar bawk.
Venglai huamchhunga Motor (Lirthei) nei tharte kan lawmpui tak zet a ni. Chhuah hmaih palhte rawn report zel rawh u…
Comments are closed.