Sub- Hqrs. YMA hruaitute’n Sialhawk YMA buai an tlawh
Venglai November, 9 : Kum 10 chuang kalta atanga boruak rip tak nei tawh, Sialhawk Branch YMA leh Sialhawk Tualto YMA inkar boruak chingfel turin Sub- Hqrs. YMA, Champhai hruaitute chu Ni 5.11.2008 (Thawhlehni) khan zankhat riakin Sialhawk YMA, V/C, MHIP, MUP leh Kohhran hrang hrang hruaitute Meeting an neihpui a, thutlukna mumal tak an la nei thei rih lo.
Sialhawk khua hi In 430 vel ni tawhin V/C Court pakhat hnuaiah an la awm khawm a. Kohhran Pawl hrang hrang awmin, Presby-terian Kohhran bikah chuan Kohhran pahnih a awm mek a. YMA-ah chuan Central YMA zawm pakhat leh Tualto YMA pakhat a awm a. Hemi chungchangah hian kum engemaw zat chu harsatna lo nei tawhin Tualto YMA lamah hian chhungkaw 130 vel an lawi mek a. Central YMA zawmtu zawk, Sialhawk Br. YMA-ah hian chhungkaw 300 vel an lawi mek thung a ni.
YMA Branch ding pahnihte inkarah hian boruak tha lo tak awm thinin chhiat/that nikhuaah pawh inthliarna te a awm thin a. Chhungkaw pakhat ami te pawh YMA ah a hrang ve ve a lawite, in thenawm hnai a hranga lawite an awm nuaih mai a ni.
Sialhawk Tualto YMA hian August thla laihawl khan Sub- Hqrs. YMA kaltlangin Central YMA zawm dilna leh Seal siam dilna an rawn thehlut a, hei hi Sialhawk Br. YMA leh V/C chuan dodal nghalin Tualto hian Central YMA a zawm a nih chuan a ziding zawk chuan Central YMA an zawmna chhutchah an tum thu an lo sawi ve thung bawk a ni.
Sialhawk khaw YMA chungchangah hian Central YMA chuan palai vawi engemaw zat a lo intir tawh a. Tun tumah hian Sub- Hqrs. YMA hruaitute hi Central YMA chuan Sialhawk YMA inkara harsatna awm chung-changah hian Palai hnathawk tur hian a tir ta a ni. Hetih rual hian thu tlukna fumfe tak siam theih a la nih loh avangin beng thara ngaihtuah leh atan thu an hnutchhiah ta a ni.
Sialhawk khaw mipui leh khawtlang hruaitute chuan an dinhmunte hrethiam tak chunga Sub- Hqrs. YMA, Champhai hruaitute’n rem an ruatpuinaah lawmawm an ti hle a ni tih thu kan lo dawng.
&&&&&&&&&&&&&&&&&&&&&&&&&&&&&&&&&&&&
Damlo
* Pu JH. Thahleikhuaia, HH Section chu a lung lam that lohna avangin hmunpui lam panpui a nia, dam taka an lo haw leh thuai kan duhsak e.
* Tv. K. Rohmingthanga S/o. K. Thangzauva, HH Section pawh a Pumpui zai a ni a, a thatchhoh zel kan beisei.
* Pu F. Zosangzuala S/o. F Aizika, CD Section taksa vung leh kal lam that lohna avanga anmahni In lama enkawl mek chu tunah chuan a ziaawm viau tawh tih thu kan lo dawng.
* H. Vanlalrinchhana (Thla 5) S/o. H. Rodinga, CD Section pawh Awmna avangin anmahni chenna In lamah enkawl mek a ni a, a dam leh thuai kan duhsak tak zet a ni.
Naute thar
* Pu R. Lalfakzuala (Faktea) S/o. R. Remsanga te nupa chuan Zirtawpni tlailam Dar 3:30 vel khan Aizawl Civil Hospital-ah fanu duhawm tak an nei thar a, naute hi 3.700 kgs. vel a rit a ni a, naute leh a nu pawh an tha viau tih thu kan lo dawng. Editorial Board in kan lawmpui tak zet e.
Fimkhur ru
@ Govt. Venglai Comp. M/S Compound-ah naupang then-khatte lutin thlai leh thildang an khawih chhe fo thin a, hetianga naupang Sikul Compound-a luh chingte chu man an nih chuan pawisa chawitir zel an ni ang tih Sikul thuneitute hnen atangin kan dawng. Fimkhur theuh ang u.
Khawn zo hnai
@ YMA Run sakna tur atana chhungkaw tina Vehbur khawn mek chu zawhfel thawkhat a ni tawh a, thahnemngai taka sum leh pai lo pe tute chungah Venglai Branch YMA chuan lawmthu a sawi mawlh mawlh a ni. Kan YMA Run sak ah hian Rs 5000/- in Donor a nih theih a, heng kan Donor te hi YMA Run sak zawh hunah an thlalak tar a ni ang a, an Bio-data kimchangte Branch YMA Archive-ah vawnthat a ni bawk ang. Tunah dinhmunah Keikawla Section atangin YMA Run sak chhunzawmna tur Vehbur khawn chu Branch sum enkawltute’n an dawng tawh a, Section danga khawntute pawhin a ranglama thehlut turin ngen kan ni e.
Thisen petu kha
@ Kar hmasa lama Tlangsam khua thisen petu kan veng nula, a hming kan hriat hman tak loh kha Nl. Lalrochhari D/o. C. Rokamlova a ni a, a chungah kan Branch YMA hruaitute leh Tlangsam Branch hruaitute an lawm hle a ni.
Luangmual F/C ah
@ Kan Branch member pahnih, Pu Lalrotluanga S/o. Selluaia, CD Section leh Tv. Lawmsangpuia S/o. C. Lal-thianghlima (Retailer), HH Section te chu Mizoram a Football Club ropui leh tha ber pawla sawi Luangmual F/C-ah khelin kar hmasa lawk khan Khawzawl-a Ist Div. Football Inelnaah khan Champion Team an ni a, Venglai Branch YMA chuan kan chhuang tak zet a ni.
&&&&&&&&&&&&&&&&&&&&&&&&&&&&&&&&&&&
Tangka sum ngainat
Khawvela kan cham chhungin kan nitin nuna kan mamawh 1, sum ngainatna hian mitinte min chiah hneh hle a ni. Tunlai Mizoram titi lian ber pawh eng dang ni lovin hausak thut duhna avanga Sawrkar enkawl leh ven thlap ni lo, mimal/ mi thenkhat Bank phuahchawp, a pung tam em em mai kan bawh huk avanga buaina lo thleng ta hi a ni. Kan Bible kan en chuan “Tangka sum ngainat hi Sual tinreng bul a ni” tih kan hmu a, mimal tinte kan inchhut ngun a pawimawh hle a ni.
&&&&&&&&&&&&&&&&&&&&&&&&&&&&&&&&&&&
Beat Contest
@ MZI Hqrs., Champhai chuan an din champha Vawi 25-na lawm tumin an inbuatsaih mek a. Hemi denchhen hian Sikul naupangte Exam zawh hunah Solo Competition for Under 14 yrs. leh Beat Contest buatsaih an tum a, Venglai mi leh sa Zai lama tuimi te tel ve ngei turin i han inbuatsaih teh ang u.
Champhai South-ah
Champhai South huamchhungah Party hrang hrangte’n an Party Official Candidate tur an puang fel ta a. MNF Party-in Pu Zoramthanga, Congress Party-in Pu JH. Rothuama, UDA-in Nl. H. Lalhmingthangi, Lok Shakti-in Pu K. Tawnliana leh Independent a chuh tum, Tv. Lalchhanhima Zofa (Tetea) te’n hming an pelut a ni. Tunah hian Champhai South Constituency huamchhungah Voter 15,000 dawn an awm.
CCC ah kal dawn
@ Sub- Hqrs. YMA hruaitute chu Ni 12.11. 2008 (Nilaini) a Central YMA Co-ordination Committee a tel turin Thawhlehni khian Aizawl panin an liam dawn a, hemi rual hian Sub- Hqrs. YMA pawimawhte dawrkual nghal an tum.
Committee nei hnai
@ Kan Branch YMA Executive Committee chu hun remchang hmasa berah neih tum a ni a, Gen. Conference Report, Badminton One Day Tournament, YMA Run sak chhunzawm dan tur leh Kum 2009 hruaitu thlan dan tur chungchangte ngaihtuah tur a ni ang.
Bengchheng siam su
@ Sikul naupang kumtawp Exam neih mek a nih avangin naupangte zirna tibuai thei bengchheng siam lo turin mitinte kan inngen tak meuh a ni. Hmun thenkhatah chuan zan lama Guitar nena zai luah luah ching kan awm an ti a, sim hmak chi a ni.
MPF Duty ang
@ Kumin MLA Inthlanna neih turah hian kum danga Party mi leh sa, Polling Area-a Duty thin chu ti tawh lovin Mizoram People Forum te an Duty tawh dawn a, hei hian kum upa zawk leh naupang chinchang hre vak lote, Neutral mahni Vote duhzawngte Vote hlei thei lo khawpa lo inkoh buai vel a tiziaawm tawh ang.
Lehkhabu dawng
@ Mizoram State Library chuan Raja Ram Mohan Roy Library Foundation Matching Scheme hnuaia Lehkhabu dawng turin kan Branch Library chu min rawn thlang leh a, Lehkhabu dawn turte lam tur hian lamkal intirh thuai tum a ni. Mizoram State Library-in Lehkhabu dawng tura thlante chuan Nov. 1,2008 atanga Jan.31,2009 inkar chhunga lam tur a ni.
Taxi nei thar
Pu H. Zobuanga, CD Section chuan Taxi a lachhuak thar ve leh ta. Kan lawmpui tak zet a ni.
Keimahni
@ Chawngduma Section in September thla thlenga ENTU lak man an hmuh Rs.1,300/- chu an rawn thehlut ve leh ta a, heti hian Hranghleia Section nen an tifel thawkhat a ni. Section thenkhat atang erawh a la lut mumal lo deuh va, a rang lama Pu K. Lalsawivela hnenah thehluh tur a ni e.
SECTION NEWS
Hranghleia Sect : An Section Leader fapa dam lohna avangin hmalakna thar em em an nei thei rih lova, hun remchang hmasaah Komiti koh an tum.
Keikawla Sect : An Section Asst. Leader inzai pawh tunah chuan a tha viau tawh a, motor pawh a khalhchhuak leh thei tawh. Section hruaitute an tul tlan deuh avangin hmalakna thar em em an nei lo.
Zampuimanga Sect : An Section Secretary, Tv. R. Lalbiak-tluanga chuan a hna thar (I.R. Police) a zawm tak avangin a aiawh turin Tv. Albert Lalrempuia an ruat thar.
Chawngduma Sect : Naktuk zingkar atang hian an Section huamchhunga ENTU lak man bate Section hruaitute’n an khawn kual dawn a, chhungkaw tinte lo inring lawk turin an ngen a ni. Section Committee neih thuai an tum bawk.
&&&&&&&&&&&&&&&&&&&&&&&&&&&&&&&&
Bird Flu zirhona
AH & Vety. Dept. bul tumin Nov.5 (Nilaini) Dar 11:30 Am khan Vety., Complex a Training Centre ah Bird Flu chungchang inzirtirna neih a ni a, kan Branch aiawhin Pu Lalkrossmawia, CD Section a han tel thei a ni. He hunah hian Aizawl atangin AH & Vety. Daktawr thiam rualte’n kalkhawmte zirtirna an pe a, training a kalte’n hlawkthlak an ti hle.
Zaimi te tan
Mizorama zaimite chanchin tarlanna blog thar a lo chhuak ta. zorimawi.blogspot.com ah hian a tlawh theih ta e. Khawvel hmun hrang hranga Zohnahthlak unau zaithiamte chanchin pawh phochhuah thin a ni a, Zai Rimawi ngainatute chuan a tlawh chur chur theih ta e.
Steno G-II Exam duhte tan
Mizoram Sorkar hnuaia DP & AR chuan Steno Grade III atanga Grade II kaisanna tur Exam pui buatsaih a tum a. Mizoram Sorkar hnuaia Steno Grade III kum thum (3) chin thawk mek, Mizoram Stenographers Service (MSS) Rules, 2004 in a huam chinte tan he Exam hi hmachhawn theih a ni ang.
Independent-in ding dawn
Kan Branch YMA member, Tv. Lalchhanhima Zofa (Tetea) chuan Mizoram Inthlanpui, December Ni 2-a neih turah khian Champhai South Block-ah Independent-in Bawm hun a tum a, ani hi Venglai mi leh sa, MLA Election Bawm hung hmasa ber a ni dawn a ni.
Public Meeting nei
@ MPF, Venglai Local kaihhruainain Zirtawp zan khan United Democratic Alliance (UDA) chuan Venglai Community Hall-ah Public Meeting an nei a, he hunah hian Champhai South Block UDA Candidate Nl. H. Lalhmingthangi’n thu a sawi a ni.
@ MPF, Venglai Local kaihhruaina hnuaiah Party dangte pawhin a hranpaa Public Meeting ko lovin MPF, Venglai Local leh Party hrang hrang hruaitute Meeting-in a lo rel tawh angin Public Meeting hi an la nei leh zel dawn a ni. Tin, MPF, Venglai Local-in ngenna an rawn siam angin Party tinte Public Meeting neih tur thu hi Branch YMA Information Center atanga puanchhuahsak thin an ni ang a, a audan tur pawh MPF, Venglai Local leh Party hrang hrang hruaitute remtihna angin a inang tlang vekin puanchhuah thin tur a ni a, MPF, Venglai Local chuan vengchhung mipui zawng zawngte hriatthiamna a ngen a ni.
&&&&&&&&&&&&&&&&&&&&&&&&&&&&&
Editorial…?
Nungchate’n zalen duh
Thlasik rim a lo nam a, ramsate an bu luma an mut tam hun, an hmul te pawh an hnutchhiah tam thla, Sahmul phah thla chu kan lo chuangkai leh ta a, he hun hi tunhma atang in kan Mizo pasaltha ten ramsa an veh hun a ni thin.
Tun hma lamah he hun hi Sapel miten ram vahna remchang ah hmangin Kut sa zawn hunah an hmang thin a, kan pi leh pute khan mi that, sa kap thei te an lo ngaisang a, Thangchhuahna chikhat atan Ramsa kah tam, kah tura bi thliah kahna remchangah an lo hmang thin. Chu chu ring lo mi, Kristian kan nih hmaa kan zia a ni a, Pathian ringlo mi kan nih lai chuan sa kapthei ten Thang chhuahin, Pialral ah awm tumin sa an kap chiam thin a ni.
Chanchintha mei engin kan thinlung a tihvar tak chinah chuan kan pi leh pute ngaihdan diklo leh mawlmang tak kha kan tlansan tawh a, Sa kapthei nih ai chuan a humhalhtu nih chu Pasaltha nihna zawk tih kan hria a, Ramsa leh nungchate hi Pathianin kan tana tangkai tura a siam a nih avangin humhalh a tul a ni tih kan lo hre tawh a, Pathianin duh taka a siamte an nih avang in Nova hun laia tui a let dawn pawh khan Nungchate, nupa kawp chawia Lawnga dah a, humhim vek turin Nova hnen ah Pathianin thu a pe a, kawhhmuh mai ni lovin, Nungchate humhalh chu kan Pathian Thupek a ni a, chu thupek chu amah ringtuten kan tih mamawh a ni ta zawk.
Chuvangin ramsa tihlum tura vah chhuah chu Pathian leh Sawrkar Dan kalh a chetna a ni a, Dan kalha chet chu Kristian ten kan tih loh tawp tur a ni. Kan hmangaih, kan chenpuite hi mi kut tuarin emaw chan ta ila engang chiahin nge kan ngaih ang le??? Pathianin min pek, kan ramah hian Ramsate hlim leh muang taka tual an chai a, riah run an rem ve theih hunah chuan Mizote Kristianna hian Khawvel a dengchhuak tawh ang a, rahbi thar a chuangkai tawh ang.
&&&&&&&&&&&&&&&&&&&&&&&&&&&&
“YMA Kumpuan-Ruihhlo Do”
-Lalruatkima, Gen. Secretary
Central YMA, Mizoram
I. YMA leh Kumpuan : Thupui vei zawng thlangchhuaka beihpui thlak hi YMA tan a remchang hlein a hriat a. Kan Ram leh Hnamin a hun tawng mek ang zelin YMA Kumpuan kan nei thin a ni. Kum 1981 kha UNO chuan “Rualban lote Kum” ah a puang a, YMA Kumpuan ang maiin kan bawhzui a ni. UNO bawkin Kum 1985 kha “Thalaite Kum” ah a puang leh a, chu pawh chu a Siruk lain 12th Jan.1985 khan Vanapa Hall-ah Chief Minister leh Chief Secretary hovin a hawnna Programme urhsun takin kan hmang a ni.
Mahni puala YMA Kumpuan hmasa ber ni turin Kum 1983 khan “Faina Kum” (Year of Sanitation) kan puang a, Kum 1991-ah kan puang nawn leh a. Faina thuvawnte siamin beihpui thlak a ni a. Ek In nei lovin an neih phah a, Ranvulhte midang tana hnawksak lo turin kan khuahkhirh a, Vantlang Zun In te kan lo neih phah a. Chaw eina hmun thlengin fian inhman tawm loh kan zirchhuah phah a ni. Kum 1984-ah “Sawrkar leh Vantlang thil humhalh” kumah kan puang a. Thalaite’n kut hnathawh leh intodelh a tulzia kan hriat thar theih nan Kum 1987-ah “Kut hnathawh uar Kum” kan puang leh ta a. Mi tam takin chuktuah huan, leipui siam nachang kan hriat phah a, kut hnathawh hi a zahthlak lo a ni tih kan hre thar ta zel a ni. YMA Kumpuan kan neih tawha rahchhuah duhawm berte zinga mi, Pathian thilsiamte hi inmamawh tawn kan ni tih hre tharin Kum 1992-93 kha “Nungcha humhalh Kum” ah kan puang a. Nungchate humhalh nachang hre tharin mi tam takin Silaite kan tun phah a. Tur hmanga Sava/Sangha hrai chingte phei chu misual zual tlemte chauh niin, luidunga an chungchang sawifel mai te kan inzirtir a ni.
YMA hmalaknate Sawrkar Laipuiin min hriatpui a, Ramngaw humhalh thaa min hriat avangin Kum 1986 khan India ram PM, Pu Rajiv Gandhi chuan National Award- Indira Pryadharshini Vrikshamitra min hlan a, khatih laia CYMA President, Pu B. Daniala’n a dawng a ni. Nungcha humhalh kawnga hma kan lak that avangin Kum 1993 khan India President, Dr. Shankar Dayal Sharma chuan Chawimawina Tangkapui “Indira Gandhi Paryavaran Puraskar” chu YMA te min hlan a, Tangkapui hian Rs.1,00,000/- lai a keng tel a, khatih laia CYMA President, Pu Vanlalzawma’n a zu dawng a ni. Kumpuan avang chuan Nungchate an lo zalen ta a, tunah chuan naupangte’n Sairawkherh hmanga Sava veh chu tihawmah an ngai ta lo.
Mizoramah Ruihhlo a lo lut tan a, Sualna chi hrang hrangte a lo hluar ta hle a. Kum 1994-95 chu “Khawtlang nun siamtha Kum” ah kan puang a. Kan khawtlang, chhungkua leh mimal nuna siamthat ngai siamthat a tulzia leh a siamthat dan turte kan inzirtir a. October,1,1994 zan chu Chhungkaw zanah hman a niin, hemi zan hian chhungkuaa inzirtirna hunte mi tam takin an hmang a ni.
India ramah ziak leh chhiar thiam lamah 2-na kan ni kan ti a, kan uang..mahse, ram pum huap Inelnaah kan hniam hle si a ni. Pawl sang fu, chhawr tlak loh kan tam hle a ni. Kum 1996-97 chu “Zirna uar Kum” ah kan puang leh ta a. Mi tam takin Mizoram pela eizawn nachang kan hriat phah a. Kan tlangval tam tak Sipai hlau thin khan Sipai tan chakna an lo nei ta bawk a. Branch thenkhatin School thar kan din a, zirtirtu indaih lohna School-ah te zirtir hnathawktute kan pui a. Zirlai harsate tanpuiin a thlawnin Tuition Class te kan hawng a, Zirlai tithate kan chawimawi a, a rahchhuah kan hmu ta zel a ni.
Mizoram zimte, 21087 Sq.Kms leka zau chu Tuikuk leh Chakma te’n thendarh tumin UT/ADC te zak hauh lovin an rawn dil ta hial a, chibing hri thalote lengin ‘mahni seh seh mual hranah’ tiin Mizo hnahthlak hnam thenkhatte fuihpawrhin, Politics a chanvo tha duh vang leh Hnam hmangaihna tel lo, mahni pumpui hmachhuantu, Politiciante avangin chimral leh thendarh mai theih dinhmunah kan lo awm ta reng mai a. Kum 1998-2004 te chu “Ram leh Hnam humhalh Kum” ah kan puang a. Zofate inpumkhatna tihnghehte, Electoral Roll tha leh fel fai, khua leh tui dik takte chauh chhinchhiahna turin Population Census Register te kan lo neih phah a. Mizo Hnam a awm chhunga kan Duty tur, “Ram leh Hnam humhalh” hi Kumpuan kan neih tawha kan tuipui ber a ni a. Kan hmalakna chuan “Hnama chian” (nationalism) chu thalaite thinlungah Chinung angin a tuh ta a ni.
Comments are closed.