Nimin khan Krismas lo thleng tura venhim hna thawh dan tur chungchang Champhai Police aiawhte leh YMA Sub-Hqrs. Champhai hruaitute’n an sawiho.
He hun kaihruaitu Addl. SP, C.Lalengliana chuan, sawrkarin kum danga a tih thin angin hunpui lo thleng turah hian halpuah leh halmawi chi hrang hrang, zu leh ruihhlo bakah silai lem mu kapchhuak thei te chu khapna a tihchhuah tawh thu leh kum danga khap ngai lo, Sky Lantern pawh kumin ah hian khap te zingah a tel tih a tarlang a. Hunpui lo thleng
turah hian mipui, nu nau leh kum upa zawk te’n hlim tak leh thlamuang taka hun an hman theih chu an duhthusam ber a nih thu sawiin, chumi atan chuan venhimna pawh khauh taka kalpui tum a ni tih a sawi a ni.
He hunah hian hunpui lo thleng tura venhim hna thawh dan tur hrang hrang sawiho niin, Zotlang kawn-ah Police Duty Post siam ni se, an ti a. Kum dang ang bawkin SYMA hnuaia Branch hrang hrangte chu anmahni
huamchhung theuhah duty post siam a, venhim hna thawk leh tura ngen ni se, YMA duty post hrang hrang hi Police mobile Duty te’n a tul angin tlawhchhuak thin se, tiin an rel a. Tun thla ni 22 atanga kum thar January ni 3 thleng venhim hna hi kalpui a ni ang.
Zan lam Curfew chu khauh zawka kalpui tum a ni a, kum danga No Vehicle Zone siam thin chu hripui vangin mipui pungkhawm tur venna atan siam loh ni se ti-a rel niin Courier Service te pawh heng khap te hi an rawn phurh luh lohna turin ngen ni se, an ti bawk. District Bawrhsapin thupek a chhuah tawh, halpuah leh halmawi, silai lem mu kapchhuak thei, zu, ruihhlo leh Sky Lantern te’n Champhai a lo luh lohna turin Khankawn Police Check Gate ah khauh zawka endik hna kalpui
tura thupek chhuah a ni tawh a. Dawr hrang hrangah heng khap te hi zuar an awm leh awm loh endik turin Police Mobile Duty te ruat an ni tawh bawk.
Khankawn Police Check Gate leh Zotlang inkarah Pathianni apiangin Drive neih thin a ni a, Drive neih apiangin mi 20 vel bawr chu man ziah an ni a. Helai hmunah hian ngawrh zawka Drive neih chhunzawm zel turin thukhawm chuan a rel bawk.
Comments are closed.