Champhai Grape Growers Society chuan Tlangsam Winery-a her turin Kuthnathawk-tute Grape thar chhuah Qntl. 831 leh Kg 46 an lei sak tawh.
Grape hi kumin July ni 13 atangin an lei tan a, tum 6 la tawhin Kg 1 hi Rs 60 zelin an leisak a ni. Champhai leh a chheh vela Grape chingtute chuan nikum lam aiin Grape thar chhuak hnem mah se, a hnah na avanga Grape rah hmin thei lo a tam avangin an beisei ang an thar chhuak thei lo a. Kumin hian Grape hi Qntl 1500 vel lei theih an inbeisei tih Society hruaitute chuan an sawi.
Nimin tlai thleng khan Grape rah Qntl. 831 leh Kg 46 lei sak tawhin, hei hi Cheng 49,88,760 hu a ni. Hnahlan Grape Grower & Processing Society pawhin Grape Qntl 1650 an lei tawh bawk a. Hnahlan leh a chheh vela Grape rah hnukhawi tlema zawng la lei tur a awm tih loh chu an lei zo thuak tawh a ni.
Hetih lai hian Sorkarin zu khap burna dan a siamah Grape atanga Wine siam chhuah chu khap tel a nih avangin Winery atanga Wine an siam chhuahte chu an la hralh chhuak thei lo zui zel a. Tlangsam Winery-ah hian Grape tui dahkhawlsa an la ngah avangin Wine-a chang tawhte chu um-ah an thun nghal zel a, tunah hian Grape tui wine-a siam tawh um-a la thun loh litre 1,14,168 an la nei mek a. Champwine Case 1900 an la nei mek. Hnahlan Winery-ah pawh Isabela Case 600 leh Grape tui wine-a la siam loh Litre 30,000 chuang an la nei mek bawk niin thu dawn a ni.
Comments are closed.