Champhai Nature Conservancy leh Champhai NGO Co-ordination Committee chuan Champhai zawl chu ‘The Mizoram Land Revenue Act, 2013’ in a sawi anga WRC atana hmang lo te chu cancel sak vek turin Chief Minister hnenah memorandum an thehlut.
Champhai Nature Conservancy leh Champhai NGO Co-ordination Committee chuan Champhai leilet zawl tihchereu a awm mek humhalh tura hma lak sak turin Chief Minister hi an ngen a. Champhai zawl chu Mizoram tana buh leh bal thar chhuahna hmun pawimawh ‘The Rice Bowl of Mizoram’ tih hiala hriat hlawh anih avangin Champhai Town Area-ah pawh hling lut lovin WRC Area Reserve niin sorkar tih dan ang ngei a hman anih zel theihna turin hma an lak thu CM hnenah hian an thlen a. Tun kum hnih thum kalta atanga kawngpui kamah In leh lo dinin buh hmun te chhilh bovin Kudam lian pui pui sak anih avangin kum danga anla tawn ngai loh tui kawng bo in buh leh bal tam tak a tichhia a, sangha dil tam tak engmah lo maiah a chan tir thu sawiin Champhai zawla In leh Kudam avangin lirthei tam tak dingin chungte chuan zun leh ek thlahdahin Tuipui chu ek thli-ah a chan tir a, Champhai mipui hriselna derthawng takah a ding tir a ni, a ti bawk.
Champhai Nature Conservancy leh Champhai NG0 Co-ordination Committee te chuan khawi atanga thuchhuak nge tih hriat lohin tunhnaiah Revenue lamin helai ram hi tehin kawngkama In leh lo leh Kudam te chu kalkanin WRC Area tibawrhbang tute tanchhan tur remchang siamsak tumna niawm taka hmalakna a awm ni a an hriat thu sawiin Champhai zawl chu “The Mizoram Land Revenue Act, 2013′ in a sawi anga WRC atana hmang lo te chu cancel sak vek turin Chief Minister an ngen a. Champhai leilet zawl chu a nihna ang ngei a buh leh bal tharchhuah nana hmang zuizel tura hma lak sak turin an ngen bawk a ni.
Champhai Nature Conservancy leh Champhai NGO Co-ordination Committee te hian an lehkha hi Agriculture Minister, Revenue Minister, Champhai South leh North MLA te bakah Champhai DC te a copy an pe ve bawk a ni.
Comments are closed.