Khawbung Branch YMA chuan nimin khan Raltlan zirlai 32 hnenah ₹ 1000/- theuh, an zirlai mamawh lei nan tanpuina sumfaiin an hlan.
Khawbung Branch YMA chuan nimin khan Khawbunga Sawrkar Primary School, Middle School pahnih leh High School tlawhin, raltlan zirlaite hnenah an zirlai mamawh leina tur Rs 1000 theuh zirlai 32 hnenah an pe a. Khawbung Branch YMA President Lalchhanhima Hnamte chuan, heng tanpuina sum hi Khawbung Branch MRB, pawlho leh mi thilphalte hnen atanga an dawn a nih thu sawiin, raltlan naupang Khawbunga zirna chhunzawm te chu kum tawp exam-ah 1-na atanga 5-na an ni deuh fur ni a sawiin, nasa zawka zirna lama tan la zel turin a fuih a. Sawrkar atanga zirlaibu leh uniform, pawl hniam lama an dawn thin chu dawn a la nih loh avangin, zirtirtu te’n a theih ang anga zirlaite mamawh tur an dappui chu lawmawm a tih thu a sawi bawk.
Khawbungah hian raltlan zirlai 68 awmin, 32 te chu sawrkar sikula kal an ni a, a dang 34 te chu PES leh Oak Ridge School-ah an kal thung a. English Medium-a kalte hi ramdang atanga puibawmtu nei, an khawsak tlema ziaawm deuhte an nih avangin, Khawbung Branch YMA chuan sawrkar sikul-a kal raltlan naupangte hi an zirna mamawh leina tur sumfai tanpuina hi an pe ta niin an sawi.
Comments are closed.