YMA Palai

Inthlang Turin Party Hrang Hrangte
Inbuatsaih Ta
Vengthlang,9th Nov. (Pathianni) : Ni 2.12.2008-a Mizoram Inthlanpui lawmawm turah Party hrang hrang leh Party behchhan nei lova mahni a din tum ten an dinna Bial tur te an puangchhuak ta. Hetih rual hian Mizoram People Forum chuan he inthlan kan hmachhawn tur hi dik leh felfai taka neih a nih theih nan Party hrang hrang Office-ah an lenkual mai bakah hruaitute nen inkawmna hun an hmang thin. Champhai North-ah Zoramthanga (MNF); T.T.Zothansanga (Cong); Zosiama Pachuau (UDA); Lalthuama Sailo (Lok Janshakti) te an in candidate dawn a. Tunah hian Candidate hrang hrangte hian beihpui an thlak mek a ni. Sawrkar lam pawh inthlanna hmachhawn tur hian a inbuatsaih mek a, Returing Officer te ko khawmin Training te an pe a ni. Inthlan felfai taka a awm theih nan MPF chuan mipuite therhlo chi hrang hrang hmanga mahni vote hralh lo turin min ngen a ni.

&&&&&&&&&&&&&&&&&&&&&&&&&&&&&&&&&&

Hluihlawn Thil Halral A Ni
Ni 3.11.2008 (Thawhtan) Zan khan Biak In kawmchhak kan Branch Diomand Jubilee bulah Camping Vawi 4 neih chhunga Camperten thil tha lo an kawl ang ang te la khawmin halralna an nei. Heng thil tha lo an lakkhawm zawng zawng hlutzawng belhkhawm hi Rs 60,477 man zet chu a ni ta.
Chung zinga thenkhatte chu: 1) Audio Cassette – 200, 2) Condom – 23, 3) Blue Film (Sex tape) – 48, 4) CD Cassette – 138, 5) Sex Bu – engemaw zat
Hengte thil an kenkhawm te hi Upa Lalruma’n dep kaiin a hal ral. Mipuiten Pathian hnenah hlanin tawngtaihona hun an hmang chhunzawm nghal bawk. Heng hluihlawn thil rawn hlantu zawng zawngte hi Pathian hnenah tawngtaipuiin turin min ngen nghal bawk a ni.

&&&&&&&&&&&&&&&&&&&&&&&&&&&&&&&&&&

Security tan la
YMA chuan kumpuan kan neih tawh loh hnuah kan Branch Security Cell chuan tunlai hian tan an la thar hle a, zan lamah pawh ngawrh takin an duty chho ta. Zirtawp zan pawh khan mi pakhat chu Jail lamah an thawn lut. Hetih rual hian veng chhung mite buaina siam lo tur leh Vengthlang huam chhungah fimkhur turin mipuite Security Cell chuan min chah thar leh a ni.

Zirlaite Ngenna
Kumtawp exam a lo hnai leh ta hle mai a. Zirlai naupang zawng zawngte zing leh tlai lamah lengchhuak lo turin kan inngen thar leh e. Tin, nu le pate pawhin kan naute teivak mai mai hian midangte a tibuai a ni tih hriain khuahkhirh an tha hle.

Tea Urn min pe
Pi Lalventhangi te chhung chuan a pasal Pu C.Rothianga tun hnaia boral ta hriat reng nan Tea Urn pahnih min pe a, an chungah Branch in lawmthu kan sawi e.

Tuiah tla hlum
Vengthlanga kum 5 zet awm Tv. Rampekmawia s/o Zama, Kawlkulh (Burma) chu Thawhlehni khan Tiau lui (Sesih kai) ah a tlahlum a, Ningani khan a tlakna li atang hian a ruang rawn lang chhuakin Burma lamah thawn chhoh nghal a ni. Peka hi Pu H.S.Vanlalfakzuala in hnuaiah a u Zawma nen awmin puan an thui thin a, Kohhran leh YMA-ah an theih ang tawkin an inhmang nasa thei hle.

Pavalai Com’ti din
Vengthlang Kohhran chuan kohhran kutke tichak turin tunhnai khan Pavalai Committee an din thara, hetah hian Pu C.Hrangmanthanga chu Chairman niin Pu Lalhuapzauva chu Secretary a ni.

In Candidate dawn
Kan Branch member Pu T.T.Zothansanga (T-Sec.) chu tun tum MLA inthlan lo awm turah Congress Party Ticket-in Champhai North huam chhungah a ding dawn a, ani hi kan Branch Member MLA Candidate awm chhun a ni.

Camp nei mek
Vengthlang North Kohhranah Special Camping chhawng 4-na tunah hian neih mek a ni a. Speaker Tv. C.Lalhming sanga, Pu Zodinsanga Khiangte leh Pu Vanlalchhuan awma te bakah thawktu mi engemawzatin Special Camping hi an enkawl a, mi 20 vel tunah hian an lut. An ei leh inte veng chhung mi tlawmngaiten an tumsak thin a, camp buatsaihtute an lawm thin hle.

Awmlai
Pu Rothianga (50) h/o Lalventhangi, K-Sec. chu hun rei tak Cancer natna a vei hnuin Thawhlehni zing dar 3:00 vel khan a boral a, hemi ni vek hian vuiliam a ni. Pu Rothianga hi kum engemawzat hruaitu hna thawk tawh a ni a, mi tlawmngai leh YMA tana mi inpe tak ani. Lusun chhungte kan tuarpui hle.

Hnatlang
Nimin zing khan kan veng chhunga Mistiri te sawmin kuang siam hnatlang neih a ni a, mistiri sawmte an thawkchhuak thain kuang thahnem tak an siam.

Kan chak ta lo
Tun hnaia Tug of War (Inhruipawh) Competition Champhaia buatsaihah. kan veng Mipa team chuan Electric Veng kan hneh lova, Hmeichhe team-in Ruantlang hneh lovin lawmman kan dawng thei ta lo a ni.

Buh seng tan
Tunlai hian Champhai zawla buh chingtute chuan an seng chho tan mek a, chhungkaw tam zawk chu an tul hle.

Dam takin lo haw
YMA Palai News Editor Tv. Lalramzauva chu Aizawl lamah a inentir a, Ningani khan dam takin a rawn haw leh ta.

Lawmthu
Pi Daki te chhungin gas Refillder thar min leisak a, an chungah kan lawm hle. Kan Gas refillder hmasa kha kan ti bova, tun thlengin kan la hmu chuang lo.

Tlawh kual
Nimin khan MPF, Champhai North & South te chuan Champhaia Party hrang hrang Campaign Office – UDA Inpui, Congress Bhavan leh MNF Information Centre te tlawh kualin inthlanna thianghlim leh felfai a awm theihna tura an hmalak ho dan turte sawipuiin an tlawh kual.

Ui leh Ar bawk
Kan chhuah zing viau tawha, thenkhat tan chuan ninawm a chang thei ang. Mahse, kan veng chhungah Ui leh Ar khuahkhirh loh a la tam hle a, mahni in bul hnaia huan thlai neituten an nin thu an rawn sawi fo avangin kan rawn tarlang nawn leh e. Mahni ui leh ar theuh i khuahkhirh thar leh ang u.

Kar Hmasa Vengchhung
Boruak tharlam em em a awm hran lova, Vengthlang Kohhran- in Thawhtanni khan Pathian hnenah Lawmthu sawiin hun an hmang tlaiah ruai an theh. Aizawl ti ti tam ber Chiahpuam chuan Vengchhungah pawh titi a ti tam hle, dawr kai tam takin hemi avangin hian Pawisa a van phah niten an sawi. Inthlan boruakin mipui rilru a la chiah hneh vak lo . Mi tamtak buhseng tul in an tul buai hle.

&&&&&&&&&&&&&&&&&&&&&&&&&&&&&&&&&&&&&&&&

AK – 47

(Chawngkhum dantlang huat loh )
J Chiahpuam dik tak chu kan nupa hian a lawm lo ni reng a. Vl-a, T-Sec
J Tunlai chu Bial nu lam pawh ka buaipui hman lo. Kawng kawiah kan “MN ka sawi thei lo” liam vut vut mai a nih hi. Ed.
J Ka tun dinhmunah chuan Tlangval kuhva kheh chak a sawi hat tham ka ni ve tlat. FK-a, News. Ed.
J Tuman Auto Rickshaw a ang min lo tih tawh suh u. Huapzauva, Jt. Ed.
J Ramsang, tun Krismas zet chu ke pali in aw…… Ramzauva, Jt. Ed.
J Camp ka luh chhan te chu Mommai vang mai mai a lawm. Nghaktei, N-Sec.
J SSA Girls Hostel-ah chuan ka hnar ring thei ber, Gate kalh chung pawhin ka lut thiam. Nite-a, K-Sec.
J Chiahpuam rau rauah chuan Zontei te chiahpuam zawrh hi a lo tha ber a nih hi. Sawmpuia, New Saron, Pu K. Lalmawia te thenawm tlangval