Mi thiam kan mamawh
Champhai khua hi mahni tawka induh ve tak, khaw danga kan thiante leh hmelhriat lemloh te nen kan inhmuh leh ti-ti ho pawha inla deuh larh, eng ni vak lemlo kan ni tlangpui a. Ngaihsan tur leh chawimawitlak han chawimawi pawh kan thiam hek lo. Kan khua hian ‘ze’ hranpa hi kan nei deuh tlat nia.
Khaw dangte chu thiamna leh zirna kawngah an intihhmuha, rualelnaah an intlansiak nasa hle. Hetiang kawngah hian kan thanharh a ngai khawp mai. Mizorama Officer lian leh mi thiam tam tak kan neih zingah hian Champhai khaw chhuak sawi tur an tam lo ta hle maia, chhiar tham lek an ni. Tun hnaiah MCS Sawrkarin a la thar leha, hun rei tak hetiang mi kan neih tawh loh hnuah Venglai tlangval R.Lalmalsawma chu a inziak tling nawlh maia. Kan lawmpui tawh tehlul nen, vanduaina tawkin min la boralsan zui leh ta nghal a! Thalai lehkha thiam leh zirna kawng zawh mekte hian hetiang kawngah hian tan lak deuh deuh tum ila, tun atangin tum fel tak neiin han zir tauh tauh teh u.
Champhaiah hian Officer post tam tak a awma, Champhai khaw mi ngeiin kan luah erawh a awm khat khawp mai. Heng bakah hian +2 leh College-ah te pawh zirna sang zawk hawn belh turin Sawrkar theihtawpin kan nawr thin a, a hlawhtlinna hmel kan hmuh dawna a khaw mi ngei induhsak dawn pawhin kan mithiam neihin kan daih lova, kan duh ang mi kan la inhmu zo ngai meuh lo chu a nih hi maw ! Hna vang leh harsa kan sawi kan sawi a, a ‘tithei fate chuan’ tih tawngkam pawh kan hmang fo thin. Mahse, zirna kawng kan zawhah hian a kawng thlan fuh a ngaia, tin, chumi bakah chuan thiamna inang nei rau rauah pawh thiam bik kan nih phawt chuan engmah tak tak hian min dang thei chuang lo. Champhai hian tan i han la leh teh ang u.
Comments are closed.