ZANGNADAWMNA DAWN A LUNGAWILO TEN NH-6 KAWNG LAIH MEK DANG

Get real time updates directly on you device, subscribe now.

NH-6 kawng laih hna thawh mekin ram a paltlang tur zinga zangnadawmna an dawn chungchanga lungawi lo intelkhawm te’n laih chhunzawm lo turin hnathawktute an dang.
National Highway No. 6 laih tura Package 3 huam chhunga ram neitu, zangnadawmna an dawn chungchanga lungawi lo intelkhawm, NH No.6 Package 3 Land Owners Association chuan an thilphut te tih hlawhtlin a nih hma chu kawng laih chhunzawm a nih lohna turin, nimin khan Khawzawl khaw bulhnaia kawng laih hna thawktute chu an hnathawk tur an dang a. Hnathawk dannaah hian Khawzawl Police te chu SP PC Lalchunglura hovin venhim hna thawkin, harsatna leh buaina thleng a erawh a awm lo.
Nimin chawhma dar 10:30 khan ram neitute hi Khawzawl Taidawnkawnah an kal khawm a. Hetah hian Land Owners Association Chairman Vanlalruaia chuan an thil phut hrang hrang te tarlangin, zangnadawmna dawn dan inang lo lutuk te, zangnadawmna an hmuhna ang ni lova kawng laih a ni te, leivung paihna tura Agreement siamnaah inbumna a awm vangte a ni tih a sawi a. An ram hlutna ang zat zangnadawmna an hmuh theihna tur leh kawng hrang hranga an thil phut te chu NH-6 thuneitu CALA hnenah an thlen tawh chungin hmalakna engmah a awm lo tih a sawi a. An harsatna tawh mekte sukiang tura vawiin ni thlenga hmalakna engmah hriat tur ala awm loh avangin leh, an harsatna te sutkian a nih theih nan kawng laih hna thawh mek chu chawlhtir ni se tiin ram neituten thutlukna an siam ta tih a sawi.
An harsatnate chinfelsak an nih hma chuan nimin atang khan tiamchin awm lovin kawng an dang ping dawn tih an tarlang a. Hemi hnu hian ram neitute hian Khawzawl Lungvar venga kawng lai mek leh Khawzawl Higher Secondary School bula kawng laih hna thawh mekte chu a hmunah kalin, hnathawktute chu hna thawk thei lovin an dang a. Hnathawk an dannaah hian harsatna leh buaina thleng a awm lo a.
Package 3 Land Owners Association-ah hian ram neitu 58 vel an awm mek.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More