Khawzawl Tuisen phai leh Champhai Police check gate, Khankawn inkar NH No. 6 Rs. Vaibelchhe 370 senna tur kawngpui zauh leh siam hna thawh mek chu Champhai District NGO Coordination Committee chuan nimin khan a hmuna kalin an hnathawh an enfiah.
NGOCC hian hnathawh kal mek chu uluk taka enfiahin, duhthusam lo lai te chu anmahni tawiawmtu Project Manager hnenah an thlen nghal a. He kawngpui sial mek hi Champhai mipui mai bakah Mizoramin a rinrawl ber tur a nih dawn avangin tha taka hnathawk tur leh an theih anga uluka hna thawk turin an ngen a ni. Tuna kawng siam mek hi Tuisen phai leh Khankawn inkar niin, Km 26.78 a thui a ni a. He kawngpui hi double lane-a siam tur niin, metre 24 atanga 27 thlenga zaua siam tur a ni.
Tuisen phai leh Khankawn inkar kawngpui siam hi Shri Balaji Construction Company te chuan an thawk a, Kumin June ni 25 atang khan hna thawh tan a ni a, ruahtui tla nasa avangin hna a khaihlak nasa hle tih hnathawktute chuan NGOCC hi an lo hrilh a ni.
He kawng siamtute hian an harsatna tawhte chu NGOCC hi lo hrilhin, hmun thenkhatah ram neituten zangnadawmna an dawnah an lungawi loh vang te leh chhan dang vanga zangnadawmna an lak theih loh vanga hna an thawh zawm theih lohna a awm tih an lo hrilh a. NGOCC chuan district thuneitute chu zangnadawmna chungchanga harsatna awm mek hi chingfel thuai turin an ngen a ni. He kawngpui siam mek hi za zela 14 thawk zo tawh anga ngaih a ni.
Comments are closed.