ZIRLAI HMEICHHIATE TANA TANGKAI TAK TUR HMANRUA SEM

Get real time updates directly on you device, subscribe now.

Nimin khan Champhai District chhunga zirna in thlan bik te hnenah zirlai hmeichhia te hman tur Pad siamna khawl leh hman tawh hnu halralna khawl chu District Bawrhsap James Lalrinchhana chuan a semchhuak.
He hun hi District Education Offfice Conference Hall ah hman niin Bawrhsap James Lalrinchhana chuan, hri leng mekah sawrkarin mipui leh zirna in tinin an zawm tura a tichhuah chu a theih ang chin chinah zawm zui zel turin a chah a. Hri vanga kum 2 chhung mumal taka sikul kal theih a nih loh avangin zirlai tam tak chu kumin hian school pangngai taka an hmuh vawi khatna tur a nih avangin an zai ngai taka zirna kalpui tur a nih thu a sawi a. An dinhmun ngaichang chunga an kal loh chuan an rilru lam thlengin nghawng tha lo a nei thei a, zirtir hna taima taka thawk a, zirlai ten an sikul chu nuam an tih theihna tura thawk turin a chah nghal a ni.
H. Lalhminghlua, Addl. DPC, Samagra Shiksha, Champhai District chuan heng khawl nihphung te a sawifiah a. Khawl an sem tur chu tuna bawrhsap ni mek, James Lalrinchhana’n Education Department Director a nih laia an buaipui, Adolesence health & hygine atanga he khawl hi dawn a ni tih a sawi.
Heng khawl pahnih hi zirlai hmeichhia te’n than thi an neih laia sikula harsatna an tawh thin te sutkian a nih theihna tura ruahman a nih thu a sawi a. Midang te hmuh mai theih lova dah tur niin zirlai hmeichhia thanthi nei mek te’n zalen taka an hman theih tura dah tur a ni a. A hmang tu tur chuan pawisa thir a thlak ang a, Pad hi a rawn chhuak mai dawn a ni.
Heng khawl pahnih te hi zirna in thlan bik 65 – Higher Secondary School-ah 1, Govt. High School ah 16 leh Govt. Middle School 48 tan semchhuah a ni.

Comments are closed.

This website uses cookies to improve your experience. We'll assume you're ok with this, but you can opt-out if you wish. Accept Read More