Zirtawpni kalta zan thim hlim khan Champhai Police a Traffic Cell chuan Champhai leh Zokhawthar inkar, Ruantlang khaw daiah Heroin ni ngei a hriat, Sahbawn bawm 15 a dah, Gram 190 a rit chu an man.
Police-te ruihhlo man neitu a puh Vankhawchhiari, kum 42, Zokhawthar khua nia inchhal chu, Magistrate atanga hmeichhe man phalna an lak hnuah man nghal a ni a, Champhai Police Station-ah a lakah hian thubuai ziahluh nghal a ni a. Inrinni khan Court a hruai a nih hnuah Champhai district Lung Inah khung nghal a ni.
Champhai Police ten ruihhlo an man hi international market-ah ₹ Nuai 95 hu vel a ni.
Champhai Police te sawi danin tunlai hian ruihhlo a tam a, zirlai tleirawl zingah heroin khawih thar an awm nual a, nu leh pate chu an fate chik a ngaihven turin an ngen.
Ruihhlo khawih thar an tam avang hian thil bo, a bikin mobile phone bo a tam niin an sawi bakah raltlan anga inchhal, ruihhlo tawlh ru an awm nual niin an sawi bawk.
Heroin hi Myanmar atanga a rawn luh tam avangin Mizoramah a man a tlahniam nasa hle a, hawng khat (gram 12 vel) ₹ 35,000 atanga ₹ 40,000 vel ni thin kha tun dinhmunah ₹ 20,000 atanga 25,000 velah a tla thla niin Excise and Narcotics department hotute chuan an sawi.
Comments are closed.