Govt. Champhai College (GCC) Graduation Day, 2022 chu nimin khan District Bawrhsap Pu James Lalrinchhana hovin College Multipurpose Hall-ah hman a ni. Pu James Lalrinchhana’n graduate thar 2019 batch-te graduation certificate a hlan a, Pu P. Lalhmingliana, Principal, Govt Champhai College chuan Mizoram puma Physics Department-a 7-na Ngurthankimi hnenah lawmpuina pawisafai Rs. 10,000/- leh chawimawina thuziak a hlan bawk.
Khuallian Pu James Lalrinchhana chuan hlawhtlinna changa graduate tharte a lawmpui thu sawiin, an kal leh zelna turah theihtawp chhuah chhunzawm turin a chah a. Ram leh hnam tana chhawrtlak ni thei tura hmalam pan zel tur leh nih tumah chiang a, a eng zawnga thil thlir thiam fo turin a fuih a. Taksa leh rilru hrisel nei tura tan la sauh sauh tura chahin, ei leh in hrisel mai bakah nun hrisel tak zawm fo turin a chah a. Kan thil tihna kawng engkimah Pathian kan hriat reng chuan malsawmna kan dawng thin a ni a ti a, zirlai ten hma an sawn zel theih nan nu leh pa, zirtirtute an pawimawh a, zirlaite rilru ti hah zawng a awm lo tur leh theihtawp chhuaha an zirna kawnga tanpui zel zawk turin a chah bawk a ni.
Thusawitu dang Pu P. Lalhmingliana, Principal, Govt. Champhai College chuan zirna a hmasawn tur chuan hriselna ngaipawimawh chungin zuk leh hmuamah kan fihlim a ngai a ni, a ti a. Hriselna kawnga hma kan sawn zel theih nan bawlhlawh kan paih danahte kan fimkhur a ngai a, a sawngbawl dan tur dik takin mitinin kan sawngbawl a ngai a ni, a ti bawk. Vantlang thil reng rengte mahni ta ang taka kan en tur chuan hma kan sawn a ngai a, mahni hnathawhna apiangah taima tak leh rinawm taka thawk zel turin kalkhawmte chu a chah bawk a ni.
Govt. Champhai College atang hian kuminah Arts atang mi 140 in exam hmachhawnin mi 116 (82.86%) in an pass a, Science atangin mi 18 exam-in mi 16 (88.89%) an pass a, Commerce atangin mi 15 exam in 14 (93.33%) an pass bakah BCA atangin 4 examin an vaiin (100%) an pass bawk a ni. Mizorama top 10 a lang pha hi 2019 ah 3 (History leh Georaphy), 2020 ah pali (Physics, English, Education leh BCA), 2021 ah pahnih, (Pol Science leh Economic), 2022 ah pakhat (Physics) ah te an awm a ni.
Comments are closed.