ZOKHAWTHAR-AH BUNGRUA LUT LEH CHHUAK AWMLO

Sorkar Laipui Ministry of Home Affairs thupek bawhzuia Assam Rifles leh Central Customs ten Zokhawthar kaltlanga India leh Myanmar insumdawn tawnnaah bungraw lut leh chhuak an dan vangin tunah hian sumdawng bungrua engmah kal a awm lo.

He insumdawn tawnnaa sumdawngtute bakah hemi behchhana nitin eizawng, inhlawhfate leh bungraw phur thin lirthei neitute a nghawng buai hle. Myanmar atanga kuhva ro lolut thinte chu tun thla ni 7 atang khan Assam Rifes leh Customs-ten an dan bakah tunkar Thawhtanni atang khan Zokhawthar kaltlanga sumdawnna bungrua engmah kaltlang phal a ni lo va. Thudawnna in a tarlan danin nizan khan Ngopa a Assam Rifles chuan Television 10 an man bakah a phurtu aman bawk.

Sumdawngte hnen atanga thu dawn danin September ni 7 hmalama kuhva ro lakluh tawh, Champhai atanga phurh chhuahte chu Assam Rifles ten Selingah manin, Sairangah hlanthlak tir a nih bakah a phurtu lirthei  tepawh hren rih a ni a. An man chhanah hian Document fel tawklo tan chhan a nih thu dawn a ni bawk.

Tunah hian Zokhawthar hmuna bungraw phur tur nghak lirthei inziaklut hi lirthei 1000 chuang a awm a. Heng lirthei inziaklut zinga 300 bawr vel hi helai insumdawn tawnna behchhana Loan-a lirthei la an nih thu leh, ramri hrula awm Zokhawthar, Melbuk, Hruaikawn, Mualkawi leh Champhaiah bungraw lut leh chhuaka inhnangfak chhungkaw thahnem takte chu an talbuai mek a ni.

He Indo-Myanmar Border Trade hi Normal

Trade-a puan ni tawhin, March 25, 2015 khan khatih laia Union Minister for Trade & Industries in Land Custom Station chu a nih tur ang taka kal turin a hawng a. August 8, 2018 a Trade & Commerce Minister,  Mizoram leh Chin State Chief Minister ten, helai hmun kaltlanga khawvel ramdang miten dan pangngai anga an kal theihna tur ‘Agreement on Land Border Crossing with Myanmar’ an hawng dun tawh bawka. He Trade Point-a awm ngei ngei tur hmanrua te hi vawiin  thlengabunfel a la nih loh avangin dan ang takin engmah kalpui theih a la ni chuang lo a ni