Hri leng thawh hnihna avanga tlawhpawh phal loh (Containment Zone)-a puan mek Zokhawthar khawtlang hnenah CM’s Relief Fund kaltlangin tanpuina pawisafai Rs. 1,50,000 hlan a ni.
Khawtlangah Covid-19 hri inkaidarh a awm avanga May ni 5, 2021 atanga tlawhpawh phal lohna hmun, Zokhawtharah nimin khan Chief Minister’s Relief Fund kaltlangin Rs 1,50,000 hlan a ni a. Chief Minister aiawhin Addl. DC Champhai Henry C.Lalrawnkima chuan a hlan a, Zokhawthar khawtlang aiawhin YMA hruaituten an dawng a ni. Hemi rual hian YMA Sub-Hqrs. Champhai atanga tanpuina Rs 10,000 chu President F. Lalrinmuana’n a hlan bawk. Addl. DC Henry C.Lalrawnkima chuan, Zokhawthar khua tlawhpawh phal loha puan a nih chhunga hrikai darh zel tur chhuchat tur leh veng tura
khawtlang hruaitute thawhrimna chu fakawm a tih thu sawiin, sawrkar aiawhin lawmthu a sawi a. Tlawhpawh phal loha puan an nih chhunga chhuanchham mai thei dinhmuna awmte hre rengin Champhai District tana CM Relief Fund dawn Rs 2,50,000 atanga Rs 1,50,000 chu Champhai DC ruahmannain Zokhawthar khawtlang pek ni se ti a thutlukna siam a nih thu a sawi a. Ramri-a awm kan mi leh sate leh ram himna hi sawrkarin a ngai pawimawh hle a ni tiin, harsatna an neihte thuneitute hnena thlen hreh lo tur leh finchhuah ngaih huna finchhuah hrehlo turin a chah a. Ram leh hnam hmangaihna tak tak thinlung pu chunga thawhpui zel tura sawmin, Covid-19 hrileng vanga chhuanchhamte chhawmdawl nana hman turin tanpuina Rs 1,50,000 chu Zokhawthar khawtlang tan a hlan a ni.
YMA Sub-Hqrs. Champhai President F.Lalrinmuana pawhin thu sawiin, hun rei tak tlawhpawh phal loha awm Zokhawthar tawrhna leh harsatna tawhte an hriatpui reng tih a sawi a. Tih theih tam lo mah se a tul leh mamawh apianga an hman atan SYMA Champhai kaltlang tanpuina pawisafai Rs 10,000 chu Zokhawthar khawtlang tan a hlan a ni. He hunah hian Zokhawthar khawtlang aiawhin Branch YMA President, Thankunga Pachuau chuan Sawrkar, YMA Sub-Hqrs. leh Zokhawthar khawtlang tana luangchhuak zawng zawngte chungah lawmthu a sawi a ni.
Hetihlai hian, thla kalta May ni 5-a hri kai hmuhchhuah an tam avanga tlawhpawh phal loha puan Zokhawthar khua chu hri kai an kiam tak avangin, CMO thurawn angin nimin tlai khan Champhai District Magistrate Maria CT Zuali chuan hriattirna chhuahin, hlih a ni ta tih a tarlang.
Comments are closed.